بسبب ظهورها خلال الفيديوهات بصورة تسئ للمصريين بعد أن ظهرت وهي تروج للطعام المجاني بشكل مبتذل يقلل من شأن المواطن المصري
وكتب أحد النشطاء على صفحته الشخصية بموقع التواصل الإجتماعي فيسبوك :
مش عارفة والله أقول عليها بلوجر أو انفلونسر الست بتاعت الفيديوهات دي حرفياً في كل فيديو بتنشره بتعمل كل حاجة تسيء لمصر
أنا برضو مش عارفة أقول إنها بتعمل عُمرة هي وجوزها لأنها حتى زي ما الناس بتقولها مصورتيش حتى الكعبة.. ولما صورت الكعبة كانت مشغلاها بالتلفزيون
دايما فيديوهات فيها تسول مش عمرة خاااالص
زي مثلا راحت مكان بيقدم وجبات مجانية للمعتمرين المتعففين ومحتاجين طعام بيقفوا طابور وياخدوها بشكل آدمي..
قوم إيه تقف هي وجوزها وخدت أربع وجبات غير العصاير والكانز وطالعة في فيديو تقول أنا مش شحاتة بس شوفوا بيوزعوا الأكل ببلاش شوفوا الأكل الله ده فيه صدر فرخة كمان وكأنها مبتشوفش صدر فرخة في حياتها وتفتح وتلُغ بايدها قال يعني البساط أحمدي وزي السعوديين ما بياكلوا ده مش قرف
وفيديوا تاني بيلغوا رأس جدي كأن مجاعة حرفيا مش فاهمة إيه الهدف
حتى ماية زمزم طالعة تقول بكل انبهار ماية زمزم ياجمااااعة ورشتها على نفسها وتقول لجوزها تعرف حسيت حاجة طالعة مني بمنتهى الجهل.. وحتى ياريتها في الحرم برضو مش فيه لدرجة شكيت إنهم مش في عمرة أصلا
ولا فيديو تالت قاعدين ياكلوا على الرصيف وواحد اداهم شاي عملوا احتفال بقى.. ما هو طبيعي وانت ماشي بتقابل اللي بيديك شاي واللي بيديك قهوة ويديك تمر أو ماية مفيش انبهار..
اللي مش عادي إنك تصدر صورة لينا كأننا متسولين ويتقال ليها حق السعودية تطبق عليكم الإعاشة وتفرض عليكم وجبات علشان متتسولوش
فعلا فعلا كل ڤيديوهاتها فيها تسول وكأنها هي وجوزها متعمدين أو هما معندهمش وعي نهائي ولازم حد يوقفهم
وعلى حد علمي الست دي أو غيرها من بتوع الفيديوهات بيكسبوا كتير ومش محتاجين للتسول ده علشان يبقوا كده
لازم وقفة مع اي حد بتاع فيديوهات ويسافر السعودية أو أي مكان ويروج فيديوهات من النوعية دي اللي فيها تقليل من مصر والمصريين خصوصا إنهم بكل أسف بيتشافوا ويعملوا مشاهدات
أنا حقيقي معرفهاش مين دي ومش متابعاها ولسوء حظي ڤيديوهاتها تظهرلي