كشفت هبة السويدي مؤسسة مستشفي أهل مصر عن تطورات الحالة الصحية لـ الطفلة مليكة الناجية الوحيدة من حريق شقة العمرانية
وكتبت عبر صفحتها الشخصية بموقع التواصل الإجتماعي فيسبوك
دايما بقول للدكاترة معانا، إحنا بناخد بالأسباب، لكن في النهاية الأمر كله لله. و ممكن حالة تكون إصابتها بالغة جدا، وربنا يكتب لها النجاة.
وده اللي حصل مع مليكة الطفلة الي عمرها 9 سنين، ضحية حريق العمرانية. الي فقدت فيه أسرتها، وهي اضطرت تنط من الدور السابع، وقعت في باسكت مليان أكياس زبالة، فكان سبب بعد إرادة الله إنها تنجو من كسور أو إصابات خطيرة في المخ.
لكل اللي بيسألوا عنها، مليكة موجودة حاليا في #مستشفى_أهل_مصر في العناية المركزة، وبتدخل عمليات ترقيع جلد كل يومين. حروقها شديدة في الجزء السفلي من جسمها بالكامل، وللأسف لأنها مشيت وسط النيران، أصابع قدميها الكبار أصيبوا بغرغرينا، وإحنا بنبذل كل ما في وسعنا علشان نحافظ عليهم ونتجنب البتر إذا أمكن.
أما الأصعب، فهو حالتها النفسية. الصدمة اللي عاشتها كبيرة جدا، وهي لحد دلوقتي ما تعرفش أن جدتها، وخالتها، وأطفال خالتها اتوفوا في الحريق. وكلنا حريصين إن فريق التاهيل النفسي في المستشفى بيتابع معاها و يحاول يخليها تتكلم.
خالص التعازي لوالدة مليكة ولكل أفراد أسرتها، ونسأل الله أن يربط على قلوبهم.
وإن شاء الله، لما مليكة تتحسن وتكون مستعدة، ولو وافقت حنتصور معاها، ونحتفل بنجاتها.
دعواتكم لمليكة، ربنا يتم شفاءها على خير، ويجبر قلبها، ويكتب لها العمر والصحة والعافية.
