أقوال سارة خليفة في قضية هتك عرض شاب وتصويره داخل غرفة نومها
وحصل القاهرة 24 على التحقيقات في قضية اتهام سارة خليفة وآخرين بهتك عرض شاب وتصويره عارية داخل غرفة نوم بشقة المتهمة.
وشرع رجال التحقيق في مواجهة سارة خليفة بالمقاطع المضبوطة على هاتفها المحمول، وجاءت التحقيقات كالآتي:
س: ما صلتك بالمقاطع السابق عرضها عليك وبما تعللين وجودها على هاتفك المحمول؟
سارة خليفة: المقاطع دي في بيتي وصوت الأنثى اللي ظاهر في المقطع الثاني ده صوتي.
س: ماهي تفصيلات تلك الواقعة تحديدا؟
سارة خليفة: الراجل ده اسمه مسعد. ش، وكان شغال سواق على عربيتي وبعد كده سابني وراح اشتغل مع “ف” هو وأخوه، وحصلت ما بين م وف خلافات عبارة عن أن م وأخوه اتفقوا مع بعض يروحوا يرشدوا عن ف، و" م " أخد من واحد 500 ألف جنيه واتفق هو وأخوه يطلعوا يسرقوا فلوس من بيت ف، وبكده يبقوا أخدوا فلوس من الاثنين ويقولوا إن الناس اللي طلعت شقة ف، عشان يقبضوا عليه هما اللي سرقوا الفلوس والمكالمة دي كانت متسجلة بين أخو م وبين زمايله اللي هيطلعوا يمسكوا ف.
وأضافت سارة خليفة في التحقيقات: وبالنسبة للواقعة اللي تخصني أنا في البيت عندي إن مسعد كان معاه مفتاح البيت بتاعي وعدى سأل البواب بتاعنا قاله أستاذة سارة خليفة فين النهاردة، وأنا مكنتش موجودة مسافرة الإسكندرية ومش فاكرة الموضوع ده كان إمتى وتقريبا قبل تاريخ الفيديو ده بيومين.
وتابعت: أنا رجعت البيت من السفر وفي يوم وأنا في البيت لقيت باب الشقة بيتفتح وأنا استخبيت ورا الستارة وبصيت من ورا الستارة عشان أشوف كام واحد لقيته م، بس ولما طلعتله لقيته بيقولي أستاذة سارة خليفة أنا مش جاي أسرق فلوس أنا جاي آخد الرخصة بتاعتي
قولتله أنا هلم عليك الجيران دلوقتي وكنت هتصل بالنجدة قالي أبوس إيدك ما تحبسينيش أنا راجل غلبان وبتوع الأمن طلعوا وقالولي خلاص سامحيه فسألته معاك مفتاح البيت ليه لغاية دلوقتي قالي حضرتك كنتي سايبة نسخة منه ونسيتي تطلبيها مني وهو كان واقف معاه اتنين صحابه عشان ياخدوه بالعربية وهما كلموا ف، وقالوله إن أنا هبلغ الشرطة دلوقتي راح بعث التانيين جم اتخانقوا معاه وحصلت المشكلة دي في بيتي.
س: متى وأين حدثت تلك الواقعة؟
سارة خليفة: حصلت في تاريخ الفيديو ومش فاكرة وحصلت في البيت عندي في العجوزة.
س: وما صلتك بالمدعو م ش تحديدا؟
سارة خليفة: هو كان سواق عندي وبعدها سابني وراح اشتغل مع ف.
س: ماهي بيانات المدعو م ش تحديدا؟
سارة خليفة: أنا معرفش غير اسمه الثاني ومش معايا بيانات ثانية
س: ما سبب تواجده بمحل سكنك تحديدا وبين حدوث تلك الواقعة.
سارة خليفة: أنا كنت قاعدة لوحدي في البيت ولقيت باب الشقة بيتفتح واستخبيت ورا الستارة وبصيت عشان أشوف مين اللي داخل لقيته (م).
س: ما مضمون الحوار الذي دار بينكما حينها؟
سارة خليفة: هو قالي أنا مش جاي أسرق فلوس أنا جاي آخد بطاقتي ورخصتي.
س: ما التصرف الذي بدر منك حال دلوفه إلى مسكنك حينها؟
سارة خليفة: أنا بلغت الجيران والأمن وفعلا اتلموا وكنت عاوزة أبلغ النجدة.
س: ما الذي حال دون إبلاغك الشرطة حينها؟
سارة خليفة: لأن كان معاه اتنين تحت العمارة عشان يجروا بيه بعد ما يسرق الشقة ولما الناس اتلمت الاثنين اللي مع م كلموا ف وقالوله إني عاوزة أبلغ الشرطة على م وأحبسه.
س: ما التصرف الذي بدر من المتهم ف.خ.ف حيال ما تم إخباره به من هذين الشخصين؟
سارة خليفة: هو بعث اللي عندي في البيت عشان يتخانقوا مع م وحصلت المشكلة اللي في الفيديو في البيت عندي.
س: ماهي بيانات الشخصين اللذين حضرا لمسكنك بأمر المتهم ف خ ف؟
سارة خليفة: أنا معرفهمش.
س: هل سمحت لهما بالدخول إلى مسكنك والاستقرار بداخله
سارة خليفة: أنا مدخلتهمش الباب كان مفتوح لأن كان فيه خناقة
س: ما قولك حيث إن مقطع الفيديو محل واقعة التعدي على المدعو مسعد ش يظهر به هذان الشخصين يقومان بارتكاب الأفعال المادية لواقعة التعدي.
سارة خليفة: لما الاثنين دول جم قالولي إحنا هناخد مسعد ونتكلم معاه في الأوضة وسألت مسعد تعرفهم قالي أيوه أعرفهم.