انتهي طلاب الثانوية العامة منذ قليل من أداء امتحان مادتي التاريخ للشعبة الأدبية والفيزياء للشعبة العلمية
ورصدت كاميرات بعض المواقع الصحفية حالة من الإنهيار والبكاء الشديد وصل بعضها إلى نقل بعض الطالبات إلى المستشفى من أمام أحدي اللجان بمحافظة الدقهلية بسبب صعوبة الامتحان
وفي أول تعليق له علق الصحفي أحمد حافظ المتخصص في أخبار التعليم على امتحان مادتي التاريخ والفيزياء قائلا
لا الفيزياء كويسة ولا التاريخ حلو
برغم كلام بعض المعلمين إن الفيزياء معقولة.. الطلبة خارجة تعيط من اللجان. وكأن الفيزياء بقت عقدتهم في الحياة. هو ليه ٨٠٪ من بعبع الثانوية في الفيزياء؟! ليه مفيش مرة واحدة نطلع نقول الامتحان كويس والطلبة معظمها مبسوط والدينا تمام وكل واحد واخد حقه.. هل ممكن يعني يكون فيه مراجعة من الوزارة لمواصفات امتحان الفيزياء من لجنة محايدة علشان نتأكد إن المواصفات اتعملت بالمسطرة؟! هل ممكن بعد إذن حضراتكم نتأكد من لجنة محايدة إن ٧٠٪ من أسئلة الامتحان بسيطة ومتوسطة و٣٠ مستويات تفكير عليا.. ده إجراء عادي وبسيط حضراتكم ومن لجنة محايدة علشان كل واحد ياخد حقه.. مش منطقي كل الطلبة دي فاشلة.
وبخصوص التاريخ.. هو يبدو إن اللجنة اللي بتحط امتحان التاريخ طول عمرها مش بتعترف بعامل الزمن.. يعني الامتحان بتاع النهاردة من لسان طلبة عايز ٤ ساعات على الأقل. طب ليه؟! ليه تجيب امتحان في ٣ ساعات محتاج نص ضعف الوقت ده تقريبا؟!. ليه استعراض العضلات وليه حرقة الدم دي؟!.. المفروض يكون فيه عين تانية على الامتحان بعد ما يخلص يافندم لأن اللجنة واضعة الامتحان مش هتدين نفسها.
هونوا على ولادكم.. ملهمش ذنب.