علق الأستاذ أحمد حافظ الصحفي المتخصص في الشأن التعليمى بجريدة الأهرام علي واقعة تسريب إمتحان مادة الفيزياء اليوم من داخل إحدي السيارات وكتب عبر صفحته الشخصية الرسمية بموقع التواصل الاجتماعي فيس بوك .
- اللي صور ونشر امتحان الإنجليزي يوم الخميس اللي فات من الحمام، مكنش طالب، ده كان مسؤول من داخل اللجنة، واتعرف، وهيندم ندم عمره على الواقعة دي.
- اللي صور ونشر امتحان الفيزياء النهاردة وهو قاعد في العربية، برضو مش طالب، لكنه مسؤول في لجنة، واتعرف، وهيندم ندم عمره على الواقعة دي.
- لما وزارة التعليم تجيب ناس تحملها الأمانة والمسؤولية علشان يحققوا العدالة، ويطلعوا أول ناس خاينة.. الموضوع أكبر من صورة بيصورها طالب.. الموضوع بقى اللي واقف يأمن الورقة، هو اللي بيصورها وينشرها.. القصة قصة خيانة أمانة وانعدام ضمير.
- القصة قصة ورقة (مجرد ورقة) بتحدد مصير مئات الآلاف من الطلبة.. القصة قصة سؤال درجته بتوديك كلية وتاخدك من كلية وممكن تقلب مصير حياتك كلها.. القصة قصة حبر على ورق مطبوع منه شوية أسئلة هي اللي بتحدد لك مستقبلك.. فيه اللي بيجاوب بجهده وعرقه وفيه اللي يسرق ويجري.
- هقولها تاني وتالت وعاشر.. لو عايزين تقييم عادل وآدمي وإنساني وتربوي وعصري.. انسفوا الثانوية العامة.. انسفوا أي تقييم يشترك فيه بشر متعرفش نواياهم ولا يقدروا يطبقوا العدالة التعليمية بمعناها الحرفي.. انسفوا حاجة اسمها ورقة بتحدد مستقبل أجيال وأجيال.. انسفوا أي حاجة اسمها درجة توديك ودرجة تجيبك.. انسفوها ليحيا التعليم العادل.