recent
أخبار ساخنة

ملف شامل عن مميزات وعيوب المدارس التجريبية في مصر | مدونة أهل مصر

المدارس التجريبية في مصر 


من أهم الملامح اللي بتميز نظام التعليم في مصر هو التعدد والتنوع الواسع في المدارس اللي بتكون متاحة لطالب إنه يدرس فيها عشان تناسب كل فئات المجتمع المصري وتلبي كل احتياجاتهم، وبناء على مستوى الدخل والمعيشة للأسرة المصرية أو مستوى التعليم اللي حابين يعلموه لأولادهم وغيرها من المعايير اللي بتحدد نوع المدرسة اللي هيدخلها ابنهم. 


من أشهر أنواع المدراس في مصر: 

المدارس الحكومية: الأوسع والأكثر انتشار المدارسة التجريبية مدارس اللغات وغيرهم من الأنواع المختلفة، وحاليًا هنبدأ نتناول مميزات وعيوب المدارس التجريبية ونعرف عنها أكتر كونها من أشهر وأهم المدارس اللي بيلجأ ليها أولياء الأمور في مصر. 


المدارس التجريبية في 2022 

تعتبر المدارس التجريبي بديل معقول بيتجه ليه أصحاب الدخل المتوسط؛ لإنها بتوفر المميزات اللي بيحتاجها أطفالهم فهنلاقيها: أعلى من المدارس الحكومية وأقل من المدارس الخاصة فجمعت ما بين أجزاء ومميزات كل نوع فيهم، لكن مؤخرًا ظهرت قرارات في البداية بإلغاء النوع دا من المدارس واللي خلى أولياء الأمور تغضب وتعترض على القرار عشان يتم بعدها التراجع عن القرار وتفضل المدارس دي موجودة، لكن مع وجود بعض التعديلات اللي هتخضع ليها زي ما خضع ليها باقي نظام التعليم في مصر علشان كدا مهم نتعرف على مميزات وعيوب المدارس التجريبية أكتر بعد التطورات والقرارات الجديدة. 


أبرز القرارات الجديدة 

المواد في المدارس التجريبية هيتم تدريسها للمرحلة الابتدائية بالعربي فهيتم دمج (اللغة العربية والدراسات والعلوم والرياضيات) في مادة واحدة، بالإضافة لدراسة الإنجليزي كمادة منفصلة، وبعدها هيبدأ الطالب في المرحلة الإعدادية يدرس الرياضيات والعلوم بلغة تانية، عشان يعترض أولياء الأمور مرة تانية؛ لإنهم شايفين إن القرارات دي بتزيد كفة مميزات وعيوب المدارس التجريبية ناحية العيوب وبتضطرهم للمدارس الخاصة اللي معندهمش المقدرة المالية يتحملوها أو للمدارس الحكومية اللي شايفين إنها أقل في جودة وكفاءة التعليم ومش هتوفر مستوى التعليم المناسب لأولادهم. 


أنواع المدارس التجريبية 

بتعتبر المدارس التجريبية واحدة من أهم أنواع المدارس في مصر والنوع من المدارس بينقسم كمان لنوعين فرعين: المدارس التجريبية العادية (الرسمية) المدارس التجريبية المتميزة ( الرسمية المتميزة – “كانت بتسمى المستقبل سابقًا”) على الرغم من التشابه اللي ممكن يكون واضح ما بين المدارس التجريبية العادية (الرسمية) والمدارس التجريبية المتميزة (الرسمية المتميزة) إلا إن بينهم فروق واضحة  بتتلخص في نقاط أساسية وهي:

 1- المصروفات الدراسية المدارس الرسمية: بتكون مصاريفها أعلى من المدارس الحكومية بنسبة معقولة فهنلاقي مصاريف المدارس الحكومية بتتراوح من 200 جنية حتى 500 جنية على حسب الفئة العمرية أما المدارس الرسمية فتتراوح المصروفات من 600 جنية حتى 900 جنية على حسب الفئة العمرية. 

المدارس التجريبية المتميزة: فبتكون تقريبًا ضعف مصاريف المدارس التجريبية العادية فهنلاقيها بتتراوح ما بين 1800 جنية حتى 2300 جنية تقريبًا بتتحدد على حسب الفئة العمرية. 

2- كثافة الطلاب المدارس الرسمية العادية: عدد الطلاب فيها بيكون في حدود الـ٣٦ طالب يعني أقل من الحكومي، لكنه أكتر من المدارس الرسميةالمتميزة: لإننا هنلاقي عدد الطلاب فيها بيوصل لـ ٢٩ طالب بس يعني أقل بكتير. 

3- سن القبول المدارس الرسمية العادية: بتقبل من سن أصغر بشوية مقارنة بالمدارس الرسمية المتميزة فهنلاقي في المدارس الرسمية سن القبول بيبدأ من 4 سنوات تقريبًا لمرحلة رياض الأطفال. المدارس الرسمية المتميزة: بيصل سن القبول لـ 5 سنوات و 11 شهر.

 4-النطاق الجغرافي المدارس الرسمية العادية: في شروط القبول لازم يكون تابع لنفس إدارة السكن لكن، في المدارس الرسمية المتميزة: بتقبل من أي مكان أو إدارة في المحافظة نفسها. وبحسب التعديلات في النظام الجديد هيتساوى الاتنين في إنه: هيتم تدريس اللغة التانية بداية من أولى إعدادي عكس ما كان قبل كده فكنا هنلاقي في المدارس العادية بيبدأ تدريس اللغة التانية من أولى إعدادي، أما في المتميزة فكان بداية من رابعة ابتدائي لكن تم إلغاء النظام دا مع تحديثات النظام الجديد.



مميزات المدارس التجريبية


1- كثافة عددية أقل: 

من أهم مميزات مدارس التجريبي هو إن عدد طلاب أقل عشان يقدر الطالب يلاقي تركيز وياخد فرصته كاملة في التعليم. 

2- مصاريف دراسية معقولة: 

تناسب الناس اللي متقدرش على مصاريف المدارس الخاصة لأن دخلهم ميكفيش يغطي متطلباتها وفي نفس الوقت هتوفر تعليم أفضل عن تعليم الحكومي، وكمان مؤخرًا أصدر وزير التعليم قرار بإتاحة الفرصة للتقسيط بحيث يبقى الموضوع أسهل على ولي الأمر ويتخفف عنه عبء المصاريف. 

3- الاهتمام باللغات: 

بتوفر للطلاب دراسة بالإنجليزي بالإضافة لإتاحة الدراسة بلغات تانية الفرنسية أو الألمانية أو غيرهم الحاجة اللي هتساعد الطالب يتميز ويتفوق في دراسته لو كانت لغته الأساسية —-اللغة العربية- قوية؛ لإن اللغات هتوسع من إدراكه وفهمه. 

4- سن مبكر للدراسة: 

بتبدأ مرحلة رياض الأطفال Kg فيها من سن ٤ سنوات، فالبتالي الطفل بيتأسس وبيتعلم اللغات من سن صغير. ومن جانب تاني ومع كل المميزات اللي بتظهر للمدارس سواء العادية أو المتميزة إلا إنها مازال ليها عيوب واضحة لازم ننتبه ليها. 



عيوب المدارس التجريبية

١- كفاءات أقل: 

السبب الأساسي اللي بيخلي ولي الأمر يدخل ابنه مدرسة تجريبية هو إن ابنه يتعلم بشكل أفضل، ولكن من أهم عيوب المدارس التجريبية إن المدرسين اللي عندهم الكفاءة والخبرة العالية نسبتهم بسيطة مقارنة مثلًا بمدرسين مدراس اللغات فبيضطر ولي الأمر لتوفير دروس خصوصية لابنه عشان يعوض الفجوة اللي حصلت، وبيتحمل مصاريف دراسية أعلى عشان يكمل مع ابنه بطريقة سليمة ويتعلم صح زي ما بيتمنى. 

٢- إقبال كبير: 

أحد مميزات وعيوب المدارس التجريبية مع بعض إنها بتجمع ما بين مميزات نوعين من المدارس ( الحكومية والخاصة) فهنلاقي إقبال كبير عليها من أولياء الأمور ودا عيب مهم وبيزود التنافس عليها؛ لأنها بتعتبر حل وسط ومناسب ليهم ولظروفهم فبالتالي القبول والالتحاق بيها ممكن يكون صعب.

٣- هوية الطفل مهددة: 

دراسة الطفل بلغة تانية مهمة وبتسمح له بفرص أكبر لتعليم من صغره ولما يكبر بتفتح له فرص أكتر، لكن كمان بيكون معرض إنه يفقد هويته العربية الأساسية ويفقد تواصله مع المجتمع حواليه بشكل كبير مش صغير لو كانت اللغة العربية بتاعته ضعيفة، فهيكون طفل مشتت وفاقد لأهم أساس من أساسياته ودا من أكبر عيوب مدارس اللغات في مصر .

google-playkhamsatmostaqltradent