الصحفي أحمد حافظ الخبير التعليمي بجريدة الأهرام
نعم فيه زيادات في إصابات كورونا بشكل كبير، لكن إن بعض الناس تقول نوقف امتحانات نصف العام لما تبقى من صفوف دراسية، ده مش منطق أبدا.. سيبوا الطلبة اللي ذاكرت والأهالي اللي تعبت يمتحنوا ويخلصوا ويستريحوا ويكون فيه امتحانات ونتيجة يتحاسبوا عليها لو لا قدر الله الأمور تأزمت في نهاية العام وكان صعب يتعمل وقتها امتحانات.
حضرتك عايز تشوف حل في قصة الدراسة بسبب زيادة معدلات كورونا، قدامك حلول كتير بعيدا عن الامتحانات.. تطول فترة أجازة نص السنة، تبدأ الدراسة في الترم التاني بالتناوب بين الصفوف، لكن تأجل باقي الامتحانات لبعد الأجازة، فده مش حل، وبقول لحضرتك مش هيحصل، ولا الحكومة هتدرسه، ولا هتفكر فيه.
طالما الخطر هيزيد، خلال شهر فبراير، حسب وزارة الصحة ومنظمة الصحة العالمية، فأكيد الحكومة عاملة حسابها، وعندي قناعة تامة إن الوضع لو استمر في وتيرة الزيادة التصاعدية، فمش هيكون فيه بداية للترم التاني قبل نهاية فبراير، وممكن تدخل على مارس كمان.
الحكومة مش عاملة قانون مواجهة الجوائح والأوبئة علشان تركنه في الدرج.. القانون ده يتضمن تعطيل الدراسة جزئيا أو كليا في حالات الخطر الوبائي.
امتحانات الترم الأول هتكمل، ولازم تكمل.. الكلام هيكون على فترة الأجازة وموعد بداية الترم التاني.