في ذكرى صلاح قابيل :تعرف على قصة صوت الصراخ الذي سُمع من مقبرته بعد وفاته

قدمت الإعلامية علا شوشة في برنامجها الشفرة المذاع على قناة الشمس،حلقة خاصةً عن ضحايا حريق شقة العمرانية 

وفي لقاء حصري لها مع إبن السيدة صاحبة الشقة أو الجدة وشقيق والدة الأطفال عبر عن حزنه الشديد لموقف الجيران السلبي الذين انشغلوا بتصوير أسرته ولم يحاولو مساعدتهم بأي شكل من الأشكال 

وعلق قائلا 

- أختي والي هي الأم من كتر يأسها بدأت تقول لعيالها نطوا علي أمل أنهم لو وقعوا فيه أمل لو بسيط للنجاة أحسن مايموتوا محروقين , أول واحده نطت كانت الطفلة مليكة وربنا نجاها وهي في المستشفي دلوقتي , هي كانت خفيفة وربنا وقف معاها ووقعت عالزبالة بس طبعا حالتها خطرة وعملولها أكتر من عمليه , وبتعاني من حروق من الدرجة الأولي وقالولنا ممكن يبتروا رجليها 

- لكن حفصة بنت أختي مصيرها كان أصعب , لأنه وهي بتحاول تطلع من الشباك أتزنقت بين السور الحديد والتكييف قدامها والنار مسكت فيها لفترة طويلة , وأنا شوفت فيديو صعب لحفصة من شدة وبؤس النار حدفتها نصين لبره 

- أختي سارة كانت واقفه وشايفه كل الي بيحصل في حفصة بنتها وأنهارت وفضلت تصرخ ألحقونا ألحقوا بنتي , ومن كتر يأسها وهي شايفه بنتها تموت طلعت عالبلكونه وحاولت تعديلها ولكنها وقعت وماتت 

- أمي أنا زعلي كله علي أمي , هي كانت تعبانه ومريضة سرطان وكانت بتعاني من المرض وأحنا كنا بنصبرها ونهون عليها علشان تاخد العلاج بتاعها , يعني هي قاست وعانت في الدنيا كتير ، أختي مش من هنا ومقيمة في رشيد وفالعادي مكنتش بتيجي عندنا , بس لما عرفت أن امي تعبانة جوزها وافق أنها تيجي القاهرة , فلما جات حصلت المصيبه دي وكان قضاء الله كدا 

- أمي حبيبتي بعدما شافت بنتها سارة نطت ومليكة نطت وحفصة الصغيرة متعلقة , دخلت جوه الأوضه وسط النار وخدت مصعب في حضنها وناموا عالسرير وغطت حفيدها علشان ميشوفش حاجه ورفعت صباع الشهادة وأستسلموا للموت , أمي وأحنا بندفنها كانت لسه رافعه صباعها لفوق .. 

- فاجعة ومأساة صابتنا والبيت أتخرب وحياتنا أتخربت الوضع صعب لأي بني أدم يعيشوا , انا لو كنت موجود كنت هحاول أعمل اي حاجة علشان أنقذ أهلي , حريم وأطفاب قلالات الحيله وميعرفوش يتصرفوا إزاي محدش نجدهم ولا لحقهم،  

وابن خالتي برضو كان قليل الحيله ومعرفش يساعد بأي حاجه..

- مفيش في العمارة أي وسائل أمان لا طفايات حريق ولا اي وسائل خروج ولا فيه ناس عندها نخوة , مفيش أنسانية , كله طلع بعد ما كل حاجه خلصت وقالوا أحنا حاولنا ,  لا محدش حاول ولا حد فيكم عمل حاجه , قدامكم بقالهم ساعتين وكل واحد خايف علي نفسه وكل الجيران طلعوا من العمارة ووقفوا في الشارع بيتفرجوا ولا فيه حد عنده رحمه ولا أتحرك علشانهم 

انا عندي طلب أخير الناس الي بتنشر فيديوهات أهلي وأمي واختي وعيالها , أرحمونا أبوس أيديكم ارحمونا المنظر صعب , زي ما المشاهد المعروضه ع النت , ابوس أيديكم ارحمونا وارحموا أهالينا المناظر صعبة علينا , انا مش عارف انام بقالي يومين وكل مغمض عيني بشوف كل حاجة