ونعت نجوي فؤاد سهير ذكي بكلمات مؤثرة على صفحتها الشخصية بموقع التواصل الإجتماعي فيسبوك جاء فيها
يا مراري ياما
يا وجع قلبي يانا
ليه كده بس يا سهير؟! إزاي هان عليكِ تروحي بالبساطة دي وتسبينا من غير ما تودعينا؟!
كنت هموت عايزة أطمن عليكِ لما سمعت أنك عيانة وبعتلك قولتلك ما فيش وقت يا سهير، لكن ما كنتش عارفة إن الوقت هيكون قصير للدرجة دي!
واضافت مش قادرة أصدق ولا عايزة أستوعب خبر رحيلك.
من وقت ما عرفت وأنا بعيط بحرقة، بعيط على عشرة غالية عمرها ما هانت وكانت مليانة حب وود وإحترام وتقدير، بعيط على زمن جميل كنتِ أنتِ إحدى نجماته اللامعات، بعيط على أيام وسنين مرت بعدتنا ظروف ومشاغل ومتاهات الحياة عن بعضنا.
وتابعت خدتي العمر بكل حلوته يا سهير ومشيتي...
كان لسه في العمر بقية يا حبيبتي لكن لا إعتراض على حكم الله سبحانه وتعالى.
هتفضلي الأستاذة الكبيرة في عالم الرقص الشرقي اللي الأجيال كلها حبتها واتعلمت منها وحاولت تقلدها وتاخذها مثال أعلى.
أنا على يقين إن ما فيش حد في مصر ما حبّش فن سهير زكي وما كانتش الراقصة المفضلة لديه.
أسستِ مدرسة من الإبداع والتألق والنجاحات والعز والمجد، وسبتِ بصمة في عالم الفن هتفضل في البال والذاكرة وعلى كل شفة ولسان، وسبتِ في قلبي ألم كبير عمره ما هيطيب.
وختمت أرقديِ بسلام يا أم قلب أبيض، يا ريحة مصر وبساطة أهلها، يا حلوة يا سهير، يا أطيب خلق الله.
ربنا يرحمك ويغفرلك ويسامحك ويجعل عذاباتك في ميزان حسناتك ويصبرنا على فراقك.
في سلام وأمان ورحمة الله وفردوسه الأعلى يا سهير.
إنّا لله وإنّا إليه راجعون