وكتبت الصفحة أبرز ما جاء في الفيديوهات من مشاهد ضد الطفولة يرفضها المجتمع
هل الطفله دي لما تكبر هتكون فخوره بنفسها لما هتعرف ان مامتها كانت بتصور تصرفاتها الغلط بالشكل ده علي الإنترنت ... طيب هل القانون بيعاقب اللي بيحول أطفاله إلي محتوي ؟
دي مجموعه لقطات أخدتها من فيدوهات صورتها أم لبنتها اثناء عملية العقاب علي الهواء للمتابعين ... من أم لبنتها.
ايوه يا فندم .. زي ما قرأت .. من أم لبنتها.
الأم مقعده بنتها و جايبة شريط لاسق و بتلزق ايد الطفله في بعض و كإنها بتكتفها ... و قاعده تهزق فيها عشان واضح انها عملت تصرف غلط في فيديو سابق و الأم قررت تعاقبها علي الهواء مباشرة أمام المتابعين.
رجعت في صفحة الأم، لقيت الام مصوره فيديو للطفله بتعمل حركه بصباعها للأم في الفيديو اللي قبله ... تقوم الام تعمل ايه ؟
مش تمسح الفيديو من علي صفحتها ... لا ... تعمل فيديو تاني لنفسها وهي بتعاقب الطفله بلزق ايد الطفله في بعض علي الهواء للمتابعين ... عشان تطمنهم انها بتأدب الطفله .. و تهزق فيها بهزار علي الهواء للناس !
السؤال هنا ... او مجموعة أسأله هنا بصراحه
- هل الطفله الجميله دي لما تكبر و تبقي دكتوره او مهندسه او اي حاجه حتي .. هتكون فخوره بطفولتها اللي علي الملأ دي ... خصوصا انها للاسف كانت بتعمل حاجات لا تليق ؟
- هل الطفله الصغيره دي موافقه انها تتحول لمحتوى لجمع المتابعين ؟
- هل القانون بيسمح ان الام تستخدم بنتها او أولادها لجمع المشاهدات علي حساب مصلحه أطفالها و مستقبلهم ؟
- هل لو الطفله دخلت حضانه و الطفله دي عملت كده لأصحابها و الحضانه قررت تعمل في البنت زي ما الام عملت فيها ... كعقاب ... الأم هتوافق ؟
ده بلاغ للسيدة Sahar Elsonbaty و المجلس القومي للطفولة والأمومة و خط نجدة الطفل 16000 و Egyptian Public Prosecution النيابة العامة المصرية
هذا المحتوي مش المفروض يخرج من مصر، مش المفروض ان الأطفال يتم استغلالها في صناعة المحتوى و خصوصا لو كان اللي بيستغلهم الأهالي.
و أخيرا، الطفله الجميله دي انا لا أعرفها و لا شوفتها علي الحقيقه ... بس انا متأكد انها لما هتكبر هتكون راضيه و مبسوطه ان في حد ميعرفهاش حاول يحافظ لها علي خصوصيتها عشان لما تكبر محدش يوصمها او يقرر يحكم عليها بسبب طفولتها اللي اصبحت مشاع لمتابعين الترند.